أصابع الباذنجان المحشوة بالجبنة والسبانخ

أصابع الباذنجان المحشوة بالجبنة والسبانخ
المقادير:
2 ثمرة باذنجان كبيرة
كيس سبانخ مجمّد (هتلاقيه في السوبر ماركت)
½ كيلو جبنة ريكوتا (ممكن تستبدليها بالجبنة القريش أو الجبنة الكريمي)
جبنة موتزاريلا أو رومي مبشورة
ملعقة صغيرة ريحان مفروم
ملعقة كبيرة ثوم مفروم
ملح وفلفل أسود
زعتر مطحون
زيت زيتون
بقسماط
روزماري
2 بيضة
دقيق

الطريقة:
1- اغسلي الباذنجان كويس وانزعي منه الرأس، وقطّعيه شرايح طولية رفيعة.

2- حضّري 3 أطباق غويطة، الأول اخلطي فيه الدقيق مع شوية ملح وفلفل وزعتر، والثاني اخفقي فيه البيض مع شوية ملح وفلفل، وفي الثالث هتحطّي البقسماط المطحون وتخلطيه مع ملح وفلفل وزعتر.

3- غلّفي شرائح الباذنجان بالطبقات الثلاثة؛ الدقيق والبيض والبقسماط من كل الجوانب، واتأكدي إنك تتخلّصي من أي كمية زيادة.

4- حمّري شرائح الباذنجان في كمية صغيرة من زيت الزيتون، لغاية ما يبقى لونه دهبي مائل للبني، وبعد كده ارفعيها من الزيت وحطّيها على مناديل ورقية علشان تتشرّب الزيت بتاعها.

5- في طبق كبير، اخلطي الجبنة الريكوتا أو القريش مع الجبنة الموتزاريلا والبهارات والروزماري والريحان والملح والفلفل والثوم المفروم، وقلّبيهم كويس مع بعض بحيث يكوّنوا خليط متجانس.

6- بعد كده ضيفي عليهم السبانخ بعد ما تسيح وتعصريها من الميه اللي فيها، وقلّبي المكونات دي كلها مع بعض.

7- ابدئي احشي شرائح الباذنجان بخليط الجبنة والسبانخ، ولفّي الباذنجان كويس.

8- كرّري الخطوة اللي فاتت لغاية ما كل شرائح الباذنجان اللي عندك تخلص، وبعد كده رصّي أصابع الباذنجان المحشية في صينية، وعلى الوش صبّي عصير الطماطم، وفي الآخر حطّي شوية جبنة موتزاريلا أو جبنة رومي مبشورة.

9- دخّلي الصينية الفرن على درجة حرارة متوسطة لمدة 25 : 30 دقيقة، وبعد كده شغّلي عليها شواية الفرن لمدة 5 دقايق أو لغاية ما تحسّي إن الجبنة فوق الوش بقى لونها دهبي، وبعد كده طلّعيها وحطّيها في طبق التقديم وزيّنيها بالبقدونس المفروم.. وبالهنا والشفا.